KIA ထိန်းချုပ်နယ်မြေထဲကို မသွားဖို့ ပြီးခဲ့တဲ့ ဇွန်လဆန်းပိုင်းလောက်က တားမြစ်စာပေးပို့လာတာ လို့ မြစ်ကြီးနားမြို့ KBC အဖွဲ့ချုပ်က ဒေါက်တာဆမ်ဆွန်ကပြောပါတယ်။
‘’နယ်လုံကနေ စာရေးလာတာ၊ လွန်ခဲ့တဲ့မေလတုန်းက အဲဒီဝိုင်းမော်က ခရစ်ယာန်အဖွဲ့ချုပ်အဖွဲ့ဝင်တွေ က အဲဒီမှတ်တိုင် ၆ နဲ့ ၈ မှာရှိတဲ့နေရာကို မသွားနဲ့ပေါ့၊ အဲဒီနေရာက KIA နယ်မြေဖြစ်တာကိုမသွားဖို့၊ အကြောင်းကြား အသိပေးအပ်တယ်ဆိုတာကို အကြောင်းကြားတဲ့စာရောက်လာတာပေါ့ ’’
ဝိုင်းမော်မြို့နယ်ထဲက မှတ်တိုင် ၆ နဲ့ ၈ မှာရှိတဲ့ ဒုက္ခသည်စခန်းမှာ မူလက စစ်ဘေးဒုက္ခသည် ငါးထောင်နီးပါးလောက် ရှိပြီး မေလအတွင်းက တိုက်ပွဲတွေကြောင့် နောက်ထပ်စစ်ဘေးဒုက္ခသည်တွေ ထပ်တိုးလာခဲ့ရတာဖြစ်ပါတယ်။ အဲဒီစစ်ဘေးဒုက္ခသည်စခန်းကို ဝိုင်းမော် KBC အဖွဲ့က စားနပ်ရိက္ခာ သွားရောက်ကူညီပေးနေတာဖြစ်ပါယတ်။ ထပ်မသွားဖို့နဲ့ သွားရင် မတရားအသင်းဆက်သွယ်မှု ဥပဒေပုဒ်မ ၁၇ (၁)နဲ့ ငြိစွန်းမယ်ဆိုပြီး ကချင်ပြည်နယ် နယ်လုံဝန်ကြီးက အသိပေးအကြောင်းကြားစာ ပေးပို့ခဲ့တယ်လို့ ပြောပါတယ်။
ဝိုင်းမော်ဒုက္ခသည်စခန်းဟာ တရုတ်-မြန်မာနယ်စပ်နေရာမှာရှိပြီး ကချင်လွတ်မြောက်ရေးအဖွဲ့ KIA ထိန်းချုပ်ရာနယ်မြေဖြစ်ပါတယ်။
အခုလို မိုးတွင်းကာလမှာ ဒုက္ခသည် ငါးထောင်နီးပါးရဲ့ နေထိုင်စားသောက်ရေး စိုးရိမ်ရတဲ့အတွက် သွားရောက်ကူညီပေးနိုင်ဖို့ ပြည်နယ်အစိုးရဆီကို ပြန်လည်တင်ပြဖို့ စီစဉ်နေတယ်လို့ ဒေါက်တာဆမ်ဆွန် က ပြောပါတယ်။
source : RFA
https://www.rfa.org/burmese/news/ban-help-kachin-refugees-06152018061733.html
